شبكة مصر تنشر الاخبار بشكل متجدد دون أن تتدخل فى محتوى الخبر أو تغيره أو تحذفه وجميع الاخبار المعروضه على مسئولية مصدر الخبر وحده

تجربة Tgrba منذ 43 دقيقة 41 ثانية

تجربتي في النجاة و بدأ حياة جديدة بنات و ولاد بيتعرضوا لنهايات و بيفكروا الحياة انتهت كل الحكاية انكم محتاجين تقرروا تكونوا ضحية ولا أبطال لنفسكم يمكن مش سهل الوجع بس اول ما بتقرروا تكملوا حياتكم بترتاحوا جدا 💜💪 من ساعة فسخ الخطوبة و انا كنت بحاول مش اتكلم في الموضوع مش عشان زعلانة عشان قررت اكمل حياتي و إلا أموت بالحسرة بالبطئ و أعمل دور الضحية هي مش كانت خطوبة انا خلاص فرحي كان خلال شهر في يوم نقل جهازي العريس عمل ليا بلوك و قرر يمشي من غير ما حتي يقولي أقل حقوقي حتي حرمني منها كنت قاعدة جنب بابا و كان مش عايز يقولي انه اتصل و نهي كل حاجة لما قالي ضحكت بدموع فاكرة قلتله بتهزر صح معايا قالي لا يا رحاب محمد اتصل و قال عايز دهبه بس كدا .. تاني يوم نزلت شغل قعدت مدة كل ما حد يقولي محمد عامل ايه قوله الحمدلله .. فرحكم امتي ؟! قرب خلاص .. مش محتاجة حاجة يا رحاب ؟! لا الحمدلله خلصت كل حاجاتي .. انا كنت دايما بقول لماما محمد اتغير يا ماما تقولي يمكن ضغط الجواز و اصبر .. أقول لمحمد مالك طب لو بطلت تحبني نبعد بالمعروف دا طبيعي ممكن بيحصل .. انا و محمد زي اي اتنين عندهم عيوب و مميزات بس هو اختار نهاية مش لها علاقة بالعيوب ولا بالزعل لها علاقة واحدة بس بقلة الاصل و عدم الانسانية يمكن انا استحق اللي حصل معايا و زيادة لان بابا كان من الاول يقولي دا مش مناسب يا رحاب و انا كنت عبيطة مؤمنة بالتغيير بس مفيش حد بيتغير عشان حد كله كلام مع اول هزة و موقف بيظهر أصل الواحد و تربيته و ثقافته .. انا مش ضحية و محمد مش وحش بس اختار نهاية وحشة .. زي ما بيقولوا لما بتخرج من العلاقة بتعرف انها كانت خالية من الحب و التقدير و أنك كنت بتبني في الهوا .. انا حياتي حقيقي أحسن دلوقتي أقوي و عارفة عايزة ايه و الأهم مرتاحة .. بعد فسخ الخطوبة كان في فرص اتخطب تاني و قعدوا يقولوا وافقي يا رحاب و احرقي دمه انا رفضت عشاني لان اللي بيختار ينتقم من حد بيدمر نفسه الاول من غير ما يحس .. دايما بقول ربنا هيرزقني بواحد يعرف قيمتي و مش اهون عليه .. انا حقيقي مش بعرف ازعل و احقد علي حد بنسي و بكمل و بيتمسح الشخص من دماغي و روحي .. كانت أول خطوبة اتعلمت منها ازاي اختار صح مش بس علاقات اما بقي عن عوض ربنا ف كان في شغلي و قربت لصحابي أكتر و عرفت ناس جديدة و بقي طموحي أعلي الحمدلله .. انا مش ضحية ولا زعلانة بس كما تدين تدان العبد بينسي و ربنا مش بينسي كان سامع التخطيط و القرارات .. الدنيا حلوة و فيها لسه ناس حلوة بجد الحمدلله 💜

شاهد مصدر الخبر

تجربة Tgrba منذ 1 ساعة 44 دقيقة

بعد اذن الادمن مين هيبارك تعظيم سلام للورد اللى فتح فى جناين دمياط سلوى 85% أشرف 84.5% إسراء 83% أبناء مدرسة النور للمكفوفين ثانوية عامة فاقدى البصيرة اخرجوا فاقدى البصر من دائرة التكريم لا تيأسوا فأنتم تاج على رؤوسنا وفخر لبلدنا "فلا تهنوا ولا تحزنوا وأنتم الأعلون"

شاهد مصدر الخبر

تجربة Tgrba منذ 2 ساعة 43 دقيقة

#تجربة_في_مطروح شاطئ الاذاعه والتلفزيون في منطقه الفيروز شاطئ جميل جدا لو معاك اطفال ⚠مميزاته : الدخول مجانا لأنه شاطئ عام فيه حمامات و استحمام مش نضاف اوي بس اهو لأن الشواطئ الي جنبه مفيش فيها حمامات مفيش شماسي هما عاملين نظام مربعات كده بسقف خوص تخد مربع و تحط فيه 4 كراسي و ترابيزه ب 60 جنيه احلي من الشماسي بصراحه فيها خصوصيه و ضل اكتر وفيه بدالات كتير الساعه ب 40 جنيه ومميز بقي للأطفال لأن المياه ضحله تمشي 5 دقائق في عرض البحر وتلاقي المياه عند ركبتك لسا فلا خوف علي الأطفال فيه والرمله بتاعته مش متعبه في المشي

شاهد مصدر الخبر

تجربة Tgrba منذ 3 ساعة 44 دقيقة

ادم ابنى قرر يساعدنى ويدخل معايا المطبخ علشان كان نفسه ياكل بيتزا والحمد لله عملناها وطلعت تحفه وقالى صورينى ونزليها على الفيس وكده وفعلا نزلتهاله واصحابي طبعا اشادو بيه وبالبيتزا بتاعته ومن كتر مدحهم ليه (طبعا انا كنت باقراله الكومنتات لانه لسه 4 سنين ونص وكان مبسوط جدا جدا ) فكر يعمل مشروع مطعم بيتزا 😂 وهايشترى عربيه يوزع بيها البيتزا ...... المهم انه من يومها تقريبا بقاله 10 ايام واجع دماغى بالمشروع والعربيه وكل يوم عاوز نلبس وننزل نشترى العربيه علشان يبدأ يشتغل وفتح الحصاله بتاعته فيها 3 جنيه وعاوز يعمل بنصهم المشروع والنص التانى العربيه ...... بجد بيتكلم كتير فى الموضوع دا لدرجه مابقتش عارفه ارد عليه كنت باشجعه واقوله اه هانعمل المشروع ويكبر وتبقى اشهر شيف بيتزا وكده على اساس بقى طفل وخلاص لكن الموضوع مسيطر عليه جامد .....وانا زهقت من الكلام لا بقيت عارفه ارد ولا عاوزه احرجه واسكته عوزاه يفضل يتكلم معايا فى احلامه بس الموضوع بقى اوفر اتصرف معاه ازاااااى بس رد مايحبطهوش الله يكرمكو انا فهمتو ان الفلوس اللى معاه مش هاتجيب عربيه بيقولى هاخد منك قولتله اللى معايا مش هايكفى قالى اخد من بابا قولتله بردو مش هايكفى قالى خلاص نبيع عربيه بابا واجيب انا عربيه لونها تلجى 😂

شاهد مصدر الخبر

تجربة Tgrba منذ 4 ساعة 55 دقيقة

#تجربه انا انهارده جربت ايس كريم اسمه دولسيتك من شركه دولسى انا فى الاول احتقرت العلبه والشركه فقولت اجربه فلما جربته استغربت الطعم ده احسن من اى نوع ايس كريم اكلته بالعكس كمان دانا شوفت سعره اقل بكتير من اللى بره صحيح حاجه مشرفه جدا من شركه دولسى شركه حاولت تثبت نفسها فى السوق من تانى بعد ما فى شركات منافسه كتير كانت اكبر منها بجد انا ذهلت لما شوفت طعم كده فى ايس كريم بالسعر كده انا بالنسبالى كسبت انى وفرت فى حاجه بدل ما اشتريها ب٦او ٥جنيه بقيت اجبها احسن وباتنين جنيه ونص بجد شابو شركه دولسى مصر

شاهد مصدر الخبر

تجربة Tgrba منذ 5 ساعة 44 دقيقة

#تجربه تجربتي مع محل لبيع الموبيلات في ميت غمر دقهليه اسمه حكاوي بأول شارع بورسعيد والفرع التاني امام ابو سنه واسم صاحبه احمد شكري. انا اشتريت موبايل ايفون 6 مستعمل من المحل دا وبعد اسبوعين اكتشفت انه فيه مشاكل وبيسخن جاامد جدا و الموبايل مش اصلي ومتجمع ( شمال ) فرجعت له وقولت له الموبايل فيه مشاكل عايز موبايل غيره قالي ماشي وجاب لي موبايل ايفون تاني بنفس الامكانيات ونفس المساحه ونفس اللون وقالي هتدفع ٥٠٠ جنيه ودفعت واخذت الموبايل التاني على اساس انه سليم ونظيف وبحالة الجديد ومتفتحش بعد ما دفعت ال ٥٠٠ جنيه وبعد اسبوع بالظبط اكتشفت ان الموبايل مفتوح مغير شاشه وبطاريه فرجعت له علشان اغيره واخد الفلوس قالي مش بغير حاجه ومش هرجع الموبايل . وبعد ما اتكلمت مع الناس عرفت انه بيجيب الموبايلات المستعمله شمال كلها وبيبقى مبسوط جدا لما واحد يتباع منهم . للعلم انا كنت دافع في الموبايل الاول ٦٠٠٠ جنيه فياريت نخلي بالنا كلنا ومحدش يشتري موبيلات مستعمله من المحل دا علشان دول نصابين وحراميه..

شاهد مصدر الخبر

تجربة Tgrba منذ 7 ساعة 43 دقيقة

تجربتي مع الشخصين دول ا/حسين و ا/احمد انا وقعت مني شنطة فيها مبلغ مغري ولو كان اى حد لقيها كان خد الي فيها وخلاص ولكن ربنا وقعني في ناس ولاد حلال لقوا الشنطة وبداخلها فاتورة بالصدفه عليها رقمي لقيت تاني يوم بيكلموني وبيقوليلي حضرتك صاحب الشنطة انت فين واحنا نجيلك واقابلتهم ساعتها عرفت فعلا ان الدنيا لسة بخير فاتصورت معاهم وقولتلهم لازم تجربتي معاكم الناس كلها تعرفها علشان يعرفوا ان صدق رسول الله صل اللهعليه وسلم "الخير في امتي الي يوم الدين " #شكرا ا/ حسين #ا/احمد

شاهد مصدر الخبر

تجربة Tgrba منذ 8 ساعة 44 دقيقة

انا هقولكم تجربتى و هي عبارة عن{ كريم للعرق } و مش مكلف و نتيجته رهيببببه و بيبض المكان و بيخلي الريحة حلوة جداً و دى عن تجربتى الشخصيه 👌 ⛔ المكونات ⛔ معلقه كبيرة و متكونش مليانه اوى بيكربونات الصوديوم مع معلقه و نص كبار نشا أقلبهم على بعض و احط عليهم زيت جوز الهند حبه حبه و اقلب لحد ما اوصل لقوام الكريم و احطه في علبه و في التلاجة .. ✌ كله مكونات طبيعيه و دلوقت هقولكم فوايد كل مكون .. 🔹فوايد بيكربونات الصوديوم 🔹 بيشيل الخلايا الميتة ويحافظ علي مستوي الهيدروجين في البشرة و كمان هو عامل مضاد للجراثيم، فبيساعد على قتل البكتيريا اللي هيا سبب في ريحة العرق ولأن بيكربونات الصوديوم قلوي التأثير يعني مضادة للجراثيم والفطريات يعنى يعتبر مطهر ومضاد للالتهابات كمان 👍 🔹فوايد النشا 🔹 هو ملطف و بيعالج الالتهابات و اهم حاجه مبيض للبشرة 🔹فوايد زيت جوز الهند 🔹 هو منعم للبشرة و بيشيل اى بقع من على الجلد و على فكرة بيقلل علامات السيلوليت جداً و كمان ريحته حلوة اوووى 😍 يارب اكون أفادتكم ... و لو عجبكوا ياريت متنسونيش بدعوة حلوة ليا بس 👐❤

شاهد مصدر الخبر

تجربة Tgrba منذ 9 ساعة 44 دقيقة

السلام عليكم عاوز احكي تجربه مشابهه لتجربه نزلت من فتره علي الصفحه المحترمه دي من عادتي اني كل فتره ادور علي هوايه جديده اشغل بيها وقتي واطلع فيها المشاعر السلبيه ومن حوالي ٦ شهور بدأت ادور علي اليوتيوب علي هوايه جديده لحد ملقيت شغل امريكي اسمه باراكورد ودا بيستخدموا فيه خيوط الباراكورد عان يعملوا منه اساور وحاجات تانيه كتير الشغل عجبني جدااا ودخل دماغي وبدأت ادور علي الخيوط دي وبعد بحث طويييل اوي قدرت اتوصل لخامات مشابهه وبدأت اتعلم من الفيديوهات ع اليوتيوب والشغل عجب اصحابي جدا بس كان دايما فيه حاجه ناقصه هو ان الشغل مش مناسب للزوق المصري فبدأت اطور عليه وادخل الاستيلات الامريكي بالتاتش المصري البسيط وبالرغم ان الموضوع مكانش هدفه ربحي الا ان الناس بدأت تطلب مني شغل كتير ودا خلاني اطور اكتر واكتر وفي خلال ٣ شهور لقيتني كسبت من الموضوع دا حوالي ٥٠٠٠ جنيه المغزي انك لازم تفكر بره الصندوق خصوصا في الظروف الصعبه اللي بنمر بيها وبالرغم ان الموضوع حصل معايا صدفه الا انه مش لازم يبقي صدفه معاك المشاريع الصغيره اللي زي دي كتير جداااا ع النت تقدر تبحث ع اليوتيوب بانك تكتب Diy projects او small projects وانا متأكد انك هتلاقي اللي يناسبك خصوصا بعد مالتسويق بقي سهل من خلال مواقع التواصل الاجتماعي شئ جميل انك تكسب من شغل بتحبه وبتستمتع بيه

شاهد مصدر الخبر

تجربة Tgrba منذ 11 ساعة 44 دقيقة

الأطباء: إذا رأيت طفلك يجلس في وضعية حرف W فقم بمنعه على الفور للأطفال طبيعة خاصة في اللعب والمرح طوال الوقت دون إدراك منهم للعديد من الحركات بأجسامهم، قد تجدهم في بعض الأوقات يقفوا أو يجلسوا بطريقة خاطئة قد تأتي بنتائج سلبية على عظامهم التي تعد في مراحل التكوين، وكثيرا ما نجد الأطفال يجلسون بطريقة حرف W على الأرض أثناء لهوهم، فتلك الوضعية تمثل لهم الراحة والثبات نسبيا، ولكن الحقيقة أن الجلوس بهذه الطريقة معناها أن الطفل لدية بعض الليونة الزائدة، وضعف في عضلاته، وهذه الطريقة في الجلوس تضاعف نسبة الخطر عليه . مخاطر الجلوس في وضعية حرف W على الطفل تعمل الجلوس بهذه الوضعية على إضعاف المفاصل في الركبة والفخد. تؤدي إلى اعوجاج في الساقين نحو الداخل إذا ما بقي الطفل يجلس بهذه الطريقة حتى كبر. تؤدي هذه الطريقة إلى الضغط على النمو السليم للجذع، كما أنها تسبب ألماً في الظهر عندما يكبر. تؤثر على تقويم العظام للطفل. كيف يمكنك أن تعود الطفل على الجلوس بطريقة صحيحة ؟ حاول دائما ألا تشعر الطفل أنه يفعل يقوم بأفعال خطئه بل حاول أن تقوم بفرد قدميه إلى الأمام دون لفت نظره. قم بعمل تمارين لعضلات الطفل من خلال وضع كرة وتجعله يجلس عليها ويحركها لكل الاتجاهات في اليمين واليسار ثم للخلف وللأمام في هيئة لعب، وبهذا الطريقة تقوي عضلاته كما أنك تعوده على فرد قدمه مرة بعد مرة. يجب عليك تحفيز الطفل دائما عندما يقوم بعمل إيجابي والتحلي بالصبر حيث أن تغيير هذه الوضعية يحتاج إلى الكثير من الوقت منقول

شاهد مصدر الخبر





إخفـاء القائـمة